Scontru incù prufessori di u sicondu gradu in furmazione

U 15 di ghjugnu 2023, si tenia in Savaghju-Vivariu⁽¹⁾ l’ultima ghjurnata in immersione prevista in u quadru di u GPFLC 2^u Gradu ⁽²⁾  – 2022/2023.
L’associu U Pinziglione era invitatu à sta ghjurnata, prima da sparghje cù i stazienti è i furmatori di i prufessori l’attività previste da Maria Dumenica DAMIANI, rispunsevule di u situ ; eppò dinù da prisentà e risorze messe in ballu da l’associu pè i prufessori (di u primu o di u sicondu gradu).
Si hè parlatu di duie risorze trasversale ma di usu sfarente : una chì si po fà inde u stabilimente durante l’annata sculara : Frutta è legumi di stagione ; l’altra in u quadru di una surtita (forse cù d’altri lochi da scopre) : Corsa d’Orientazione à u Parcu Galea (in Tagliu Isulacciu).
Una ghjurnata ricca in scambii à prò di a pedagogia e di a lingua corsa, in un ambiente di cunvivialità.
Ringraziemu tutta a squadra di u centru chì si hè impegnata pè a riescita di sta ghjurnata. È dinù Francescu SQUARCINI, incaricatu di missione à u retturatu d’Aiacciu (Lingua corsa – Filiere bislingue – Sicondu Gradu), chì hà prupostu quist’annu un prugramma di cinque ghjurnate in immersione propiù riche, varie è à prò di a furmazione di sti prufessori di DNL⁽³⁾ chì anu da passà, da quì à pocu, l’abilitazione chì li permetterà d’intervene, in a so materia, in e scole bislingue di l’academia (sicondu gradu).



⁽¹⁾ Ghjurnata à u centru immersivu di a PEP in Savaghju-Vivariu
⁽²⁾ Grande Pianu di Furmazione in Lingua Corsa di u Sicondu Gradu 
⁽³⁾ Disciplina Nò Linguistica