M'innamoru

L'aria accarezza. Si vede stelle

Indì l'ochji di e zitelle.

U sole  bellu ti face d'oru

È m'innamoru.

 

À mezu pratu  ci hè tanti fiori !

Femu cullane cum'è i signori !

U sole bellu ti veste d'oru

È m'innamoru.

 

I pulloni  infrondanu le rame:

Cuntemu ci tutte le nostre brame !

U sole bellu ti frisgia d'oru

È m'innamoru.

 

Più cà l'acqua  fresca di a funtana

Sè fresca, sè limpida, sè sana ...

U sole bellu t'introscia d'oru

È m'innamoru.

 

Si sò carchi di sangue i chjarasgi :

Hè tempu di pindini è di basgi !

U sole bellu t'accende d'oru

È m'innamoru.

Ghjacumusantu Versini, A Cispra, 1914

A FALCA
(LAMENTU DI U FALCU)

À vulà cù la mo falca

Era statu un bellu aprile
Mentre ch’ ella stantarava
Sola ver di « Caranile »
Aghju intesu una tunata
Cum’ è un colpu di fucile
 
Puntighjeghju sti cuntorni
‘Lla ci fussi a mo cumpagna
Quandu l’acella hè ferita
O svulachjeghja o si lagna
Ma ùn vecu tremuli indocu
È ghjè muta a campagna
 
Ci avianu sceltu un locu
Un boscu di licciaconi 
Vuliamu facci un nidu
Pè i nostri falcachjoni
Oghje tuttu hè à caternu
Zenza ch’o sappii ragioni
 
Nantu à e piazze cumune

 Qualchì volta un batachjime
Per l’acellu migratore

Sò belle poche le stime
Eppuru ancu l’omu parte
À girà fondi cun cime
 
Chì vulete ch’o vi dica
Quandu vulteraghju solu
Quand’ elli s’avvideranu

Ch’ ellu hè nescu lu mo volu
Quandu li ne parleraghju
Di u paese di Golu
 
Serà stata una sciagura

Un colpu tiratu à laziu

Issu colpu di fucile

Mi ribomba sempre in capu
A mo falca hè sparita
È campu di mezu fiatu

 
Ghjuvanteramu Rocchi

Puesie ricacciate da :  E sette chjappelle, edizioni Albiana
Lista di e puesie lette :  U spavechju ; À a sbunurata ; O zitelli ! ; O quanti tetti ; In culipippuli ; L’addurmintatu di a valle ; Ma ancu.
A scelta perchè ?
À spessu, è si capisce faciule perchè, e canzone o puesie messe in musica, sò e più cunnisciute. Hè à tempu una furtuna ma dinò un’inghjustizia chì, frà i puemi lacati à u so statu solu di puesia, ci sò picculi tesori, da medità si è purtà si in sè. Per un primu lampu vi aghju sceltu parechje puesie frà e mo preferite di a racolta “E sette chjappelle”, libru pilastru di a Leva di u settanta. À cantu à testi chì anu ribumbatu nant’à tutte e scene, cù u so sensu forte d’ingagiamentu è di dichjarazione di un’identità truvendu un antru spannamente, tene puesie chì sò veri ritratti appesi. Ci ritruverete astre forze di a scrittura fusinesca: a malizia, l’arte di piglià in giru u mumentu, l’adattazione d’un capidopera, è u sapè dì isse cose suttile di u tempu chì passa o di i sensi in sussuru...

U spavechju
 
In fondu à l’ortu
Ci hè u spavechju
Di pannu mortu
Di legnu vechju

Un corbu rachja
Ver’di u spavechju
Dice à la machja
Chì l’omu hè techju
 
« Cum’è danari
à vende è spachja
vanu i s’affari »
dice a curnachja
 
Ellu di u sole
Face lu spechju
Nascenu e fole
Di u spavechju
 
Da quì li feghju
Dice l’acellu
Chì nidicheghju
Ind’u cappellu.
 
(1979)

À a sbunurata
 
A valle s’hè croscia
Di bazza calata :
A notte s’hà lasciatu
Quì è culà duie ombre
Sott’à i castagni insunnuliti ;
A machja ùn parla ancu
È u celu s’hè grisgiu ;
A mio stradella ciotta è passa
Long’à u fiume diciulone
È leva ogni vistica
È muschi zitellini ;
Una tintenna persa
Trinneca qualchì tirlu
Sott’à a filetta azeza,
è v’anscia in faccia un’aria
chì parturisce fole ;
Sta mane mi ne vò
Ad aspettà u sole...
 
(1979)

O zitelli !
 
O zitelli !
Attenti !
Ùn tirate
Ch’ùn hè micca una ghjandaghja !
Ùn tirate
Chì sò eo:
ùn si porrà omu più tastà
una chjarasgia in pace !

O quanti tetti
 
O quanti tetti
Di teghja grisgiogna
Attrachjati di culore
Sgangherati
È penciuloni…
O quanti tetti
Appughjati à a sera
Di u castagnetu
Agrufulati à lume punente...
O quanti tetti
Allucati bellu bellu
In core à mè.
 
  (1980)

In culipippuli
 
Ci vole à calà si
Pianu pianu
à orlu di ripa
in culipippuli…
È stà si zitti
Bassi bassi
Ùn trinnicà
Mancu un capellu
Ùn anscià…
Osinnò
Hè capace à vulà si ne
Da u pratu
Cum’una farfalla,
U silenziu
Di l’erba.
 
   (1980)

L’addurmintatu di a valle
 
(adattu da Rimbaud)
 
Hè un ghjargalettu zeppu
Duv’ella canta una vadina
Chì vole appende à ogni erbetta
L’argentu vivu di a so crina
Ci luce un sole muntagnolu
In a virdura di issu vallicciolu.
 
Un giuvanottu suldatellu
À bocca aperta è capinudu
Si dorme un sonnu di zitellu
À mezu à lu so lettu crudu
Di frasche verdi è di filetta:
sopra, ci hè u celu ch’aspetta
 
Dorme sticchitu è spinseratu
Cù a niscentria di l’acellu calatu :
O Natura feghja, chì mi pare malatu !
 
Ùn i sente più i to prufumi
Stracquatu à u sole, tranquillettu :
Hà leccu un paghju di palle in pettu.
 
   (1981)

Ma ancu
 
Ma ancu
S’ell’ùn firmessinu
Chè dui stracci di locu
Appesi à u viotu
Dui stracci di vita
Appesi à u silenziu
Dui stracci di sempre
Appesi à u tempu
Duie parulle d’amore
Appese à un filu…
Tuttu què
Ùn serebbe statu per nunda.
 
   (1980)





 

Ghjuvan'Filici Accidenti à l’anziani militari !« Ind’è no, ùn ci n’hè ma’ statu omini cù i pindini ! » burbuddeti u so babbu stringhjindu i denta.
Ancu quissa avali ! À mè mi pari  chì tù intuntisca ! »
Ùn era micca a insulta chì annarbaia u più à Ghjuvan’Filici, chì era di quiddi suppurtevuli è n’avia intesu d’altri, ùn era nemmenu u ghjudiziu, chì ùn s’aspittaia mancu à veda u Vechju tradiscia l’anziana scola chì l’avia furmatu ; ciò chì l’annarbaia u più, ma ch’iddu ùn suppurtaia micca di u tuttu, era issu « ind’è no », issu « ind’è no » ch’iddu li risirvia sempri è chì tuccaia à ugni volta, com’è a frezza a più pinzuta d’un archeru spertu.
Par ugni cosa u babbu li sciaccaia issu « ind’è no » in i denta, è ci n’era suttintesi, in issa furmulazioni ! « ind’è no »... « ind’è no »... Parchì, quali eramu « no » ? Eramu meddu chè l’altri ? In quissa a famidda, ùn ci n’era mattaghjati, debbuli, aienti torti, latri è ancu assassini ? « No » eramu a ghjustizia parsunificata ? L’onestità? L’integrità? Ci n’era esempii chì Ghjuvan’Filici pudia mintuà di vituparati, di tranchji, è di sviati, frateddi o cugini, chì issu « no » era sinsatu d’integrà... À chì ùn pacaia i so impositi, à chì facia creda ch’iddu parsiguia i studii d’ecunumia è manghjaia i solda ‘lli parenti in cuntinenti, un altru si drugaia è nimu a vulia veda, parchì vedala saria stata com’è d’ubligassi à intarvena, à assuma, è « ind’è no », ben intesa, era chjara chì nimu si pudissi drugà ! « No » ! « No »! Noi altri ùn la spartiamu micca a disgrazia di l’altri ! Eramu più astuti ! « ind’è no » ùn ci era cà sinnati ! È di credala quissa pirmittia di pudenni parlà, di l’altri...

Marcu Biancarelli, Prighjuneri, ed. Albiana, 2000.