U Pinziglione hè statu invitatu da RCFM à participà à l'emissione SAPIENZA, purtata da Isabelle DON-IGNAZI è Fabrice FENOUILLERE u 9 d'aprile 2023. Stu scontru ci hà permessu di presentà l'associu è l'attività chè no' mettimu in ballu.
Eccu quì sottu l'arrigistramentu  di l'emissione, fattu u 3 d'aprile.

U Pinziglione hè statu invitatu da RCFM à participà à l'emissione SAPIENZA, purtata da Isabelle DON-IGNAZI è Fabrice FENOUILLERE u 9 d'aprile 2023. Stu scontru ci hà permessu di presentà l'associu è l'attività chè no' mettimu in ballu.
Eccu quì sottu l'arrigistramentu  di l'emissione, fattu u 3 d'aprile.

Stu 25 di marzu 2023, U Pinziglione era in Orezza. A mattina à l’usina di l’Acque d’Orezza, simu stati ricevuti da u Direttore, Jean-Paul ALBERTINI pè una visita avviata di stu locu di pruduzzione. Era presente dinù Stella PIERI, a merressa di u paese di Rapaghju induve si trova l’usina. Dopu un bellu ripastu à l’osteria Le Refuge, avemu visitatu a chjesa di Pedicroce incù Alexandre Giorgi d’Oriano. Simu andati dopu in u paese di Carchetu à scuntrà Jean-Claude ROGLIANO in u so locu chjamatu « E Torre di Tevola ». Per compie, una visita in a chiesa di Carchetu-Brusticu incù torna Alexandre Giorgi d’Oriano.

Grazie à tutti l’intervenenti, chì anu spartutu e so pasione incù maestria è cunvivialità. Torna una ghjurnata ricca di scontri è di scuperte, incù una lingua viva.
Eccu quì sottu unipoche di ritratti di sta ghjurnata orezzinca :

Stu 26 di marzu 2022, in u quatru di e ghjurnate 2022 di l’Accumpagnatori di Muntagna in Corsica, u Scagnu muntagnolu Nebbiu ci hà invitatu à a scuperta di u Chjassu di a memoria in Patrimoniu, apertu da pocu. Ghjurnata avviata da l’amichi François Tomasi è Jean-Marc Poggi, guidi di muntagna.
Dopu à u caffè in l'anfiteatru di e notte di a ghittara, avemu principiatu u nostru giru incù a ghjesgia San Martinu è u paisolu di Cardetu. Dopu, avemu vistu u paisolu di u Calvellu, incù u so casale di listessu nome (nantu i muri si vedenu sempre i tuvoni di e cannunate francese di 1768 !). Seguitendu u chjassu, simu falati versu u Fiume Albinu per francà u vechju ponte è vede i so mulini è e so piove. Lascendu u fiume, si hè attippatu versu A Ficaghja, u più altu è più anzianu paisolu di Patrimoniu. Seguitendu, simu cullati versu A Tozza, situ di l’anzianu castellu Cortincu.
Dopu à un spuntinu à l'appossu (ci era un pocu di sciroccu), simu turnati in paese pè salutà "u Nativu", a sola stantara di calcina in Corsica.
Mà i giri di l'associu, permetenu dinù belli scontri di ghjenti sopra locu. Cume l'amicu Christian Andreani, chì ci hà parlatu cù passione di sti lochi. È dinù di Mma Mimi Dominici chì ci hà ricevutu in casa incù cusì boni panzarotti è dinù in canzona (fighjate a video sottu).