Menu
Lettu 58 volte

Un nome, una puesia di Patrizia Gattaceca

Patrizia Gattaceca, di a Penta Acquatella, hè prufessora di corsu, cantarina, teatrina è pueta.
Un’artista chì da l’anni 70 si impegna da dà un fiatu novu à u cantu corsu. A so voce, a so sensibilità è a so prestenza alluminanu e scene di corsica è d’altrò.


<i><b> Un nome</b></i>, una puesia di Patrizia Gattaceca

Sta puesie stratta da u dischettu "Passagera" palesa a spera, l’amore è a leia stretta ch’ellu ci hè trà l’omu, custrettu à l’esiliu, è a so terra.


Un nome

À collu u to fangottu di miseria cusgitu

Di issa terra ferita

Per impettà a vita chì t’apre le so porte

S’è dumane t’invita chì ne sarà a sorte ?

S’hà pigliatu a guerra e rise è e canzone

S’hè pisiu u sole svanitu u cantu

È ti lasci l’agnone

Ti ferma solu un nome da inventà d’altre fole...

Francà l’onde di u mare senza sapè chì mondu

In u ballu di a ronda i destini ùn sò pari

Sottu à chì celi novi l’ore sbucinerai ?

Chì chjassu sarà toiu chì furtuna o chì guai ?

È sì scalatu quì giuvanottu valente

À spone u to fangottu di polvera è di stantu

Pè truvà ci un agrottu

Un core una surgente l’amore cum’è un portu...

Ti ferma solu un nome, un esiliu, una spera

 Pè a terra diletta duv’è tù ti ne vai...