Menu
Lettu 67 volte

U tigliu , un testu di Ghjuvan Marcu Leca

Ghjuvan Marcu Leca, di Guagnu (Vicu Sagone), hè prufessore di corsu.


<i><b>U tigliu </b></i>, un testu di Ghjuvan Marcu Leca

In u so scrittu, "U tigliu", ci parla di i disguasti maiò, indutti da l’usina di tigliu da u 1928 à 1965 in Canari. Sta calamità fù dannosa pè l’ambiente capicursinu è l’operai chì ci travagliavanu cum’elle funu dannose quelle di e Fanghe Rosse in u 1972 è di Tchernobil in u 1989.


U tigliu

Affaccanu aghjà e vitture, in quellu paisolu oramai calmu, u minimu trostu si sente subbitu. Appruntendu si per sorte dopu à u prima toccu di campana, Ghjaseppu Maria pensa à a so zitellina.
Tutte e sante mane sintia ghjunghje i centinarii d’uperai da u so paisolu di Canari. Aspittendu u so carru per falà à u culleghju in Bastia a si chjachjarava cù u so ziu Anton Ghjuvanni, chì ellu avia appena compiu a so stonda di travagliu è si ne vultava in casa, per dorme. Dopu à unipochi d’anni di sirviziu l’usina era in attività vinti quattr’ore à ghjornu è l’operai di a notte lasciavanu a piazza à quelli di u ghjornu è à u vultà da u liceu Ghjaseppu Maria i vidia passà carchi di folfara è vultà si ne in casa, in u mentre ch’elli cullavanu l’uperai di a sera. Ci era tandu in quellu paisolu capicursinu un bullore di l’altru mondu è a populazione di i paesi di u circondu criscia quandu chì quella di a Corsica sana calava, chì mancava u travagliu. In Canari invece ci era, è l’usina chì à principiu avia da trattà 2 000 tunnellate era ghjunta à trattà ne 12 0000 trà u 1948 è u 1953 assicurendu cusì 25 % di a pruduzzione francese. Anton Ghjuvanni era stancu ma era fieru di pudè cuntà ch’ellu participava à tamanta impresa. Ùn istarà tantu à sunà u sicondu toccu di campana è, lighendu a so cruvata, s’arricorda l’omu ch’ellu era 15 statu u so ziu à insignà li à fà u nodu. Abbandunatu ch’ellu t’avia i posti di pruduzzione per u travagliu amministrativu, Anton Ghjuvanni ùn si chjinava più à l’ora ch’ellu partia u nipote ; s’appruntavanu inseme è parlavanu cum’è sempre, macaru ancu di più avà.
Anton Ghjuvanni avia mutivatu à Ghjaseppu Maria da ch’ellu partissi in Ecchisi à fà i so studii, ùn vulia vede u so nipote travaglià à l’usina. Era delegatu sindicale è cunniscia i raporti di l’ispittori di u travagliu inquant’à a securità sanitaria.
Ch’elle ùn eranu sane e cundizione di travagliu, ognunu a sapia, ma ci era cusì pocu travagliu in Corsica tandu, chì a ghjente facia nece d’ùn sapè. Anton Ghjuvanni ne patia pocu d'isse cundizione dapoi unipochi d’anni, e so faccende ùn eranu più quelle di i primi anni à insaccà u tigliu l’ore sane, avà si n’era cullatu in i scagni è s’occupava di robba amministrativa. Hè cusì ch’ellu cunniscia à mente tutta a storia di u situ è a cuntava à spessu à u so nipote : « Sò più di cent’anni ch’elli a sanu ch’ellu ci hè u tigliu in Corsica, prima anu vistigatu a piaghja trà u 1830 è u 1850, dopu anu fattu e prime splutazione in Castagniccia è in lu Nebbiu po dopu in u 1928 si sò stallati in Canari. A sai, o nipò, parchè ch’elli sò ghjunti à stallà si quì ? » ripitia u vechju ziu cum’è per cuntrullà chì Ghjaseppu Maria avissi ritinutu a lizziò. È senza aspittà a risposta di u nipote, rispundia ellu, insignendu li di ditu quella costa chì supraneghja u paese è si lampa dritta dritta in mare. « Hè tutta falata quì, hè bastatu un bellu scassu per fà l’usina è dopu tuttu u scartu di i scavi si ne fala da par ellu... in mare è cusì ogni tunnellata cacciata costa 30 % in menu ». In u so racontu u paisanu si lagnava di i disguasti caghjunati à quella marina è u sindicalistu si rammintava chì in u 1956 i dirigenti di l’usina pinsiravanu per ciò ch’elle pudarianu pinsà e cummissione turistiche di i danni fatti à i paisaghji, mentre chì ùn era ancu disciolta a prublematica di a folfara. « Noi altri operai cuntemu menu cà i paisaghji » avia dettu tandu à u direttore.
Sona u sicondu toccu è Ghjaseppu Maria sente à a radiu l’ultime nutizie di a mubilizazione contr’à i fanghi rossi. "I fanghi cum’è a folfara, pinsava in sè Ghjaseppu Maria, pare chì certi industriali ùn abbiinu primura nè d'aria nè di mare".
A folfara di u tigliu, era quessu u prublema maiò di l’usina di Canari. A rispiravanu l’operai, 40 impia u paese è facia una fumaccia cusì zeppa chì tuccava à i cunduttori ad accende i so fari i passendu vicin’à l’usina. « A sapianu ch’ella era periculosa. In u 1913 ci era digià un dicretu chì dicia chì l’operai avianu da avè da travaglià in un’atmusfera « guasgì » nurmale », spiegava Anton Ghjuvanni nanzu di cuntà chì in Italia, in l’usina di Balangero, ch’elli avianu visitatu in u 1953, ùn ci era guasgì micca folfara. Ogni tantu u sindicalistu si ramintava quella greva di u 1952 chì li avia parmessu d’ottene aspiratori per  u insaccà di u tigliu è maschare per l’operai, ma quelle si tappavanu subbitu subbitu è ùn ghjuvavanu ànulla.
Di pettu à tanti risichi sanitarii è senza ch’ella sia ricunnisciuta una malatia prufissiunale qualunque, l’usina avia sarratu in 1965 è in u 1963, Anton Ghjuvanni avia vintu una di e so battaglie : uso nipote era partutu à fà studii.
Prontu è allisciatu aspetta Ghjaseppu Maria in piazza à a ghjesgia. È sona u terzu toccu, mentre chì u vitturone neru chì porta à Anton Ghjuvanni entre inpaese seguitatu da tanta ghjente ghjunta à salutà quellu chì avia difesu i so intaressi è a so salute, ancu à discapitu di a soia.
Ghjuvan Marcu Leca
                                                                                                                                                      

"L’usina di Canari"

Antone Marielli, di sta disgrazia, eculogichi è umani, ne hà fattu una canzona ch’ellu canta cù u so gruppu Diana di L’Alba.
 
In muntagna canarese ci anu  alzatu un’ usina
E galerie prufonde corciu à chì tribbulatu
E fatighe furibonde issu tigliu sbrisgiulatu
Culpia sangue è pulmoni povari disgraziati
Parechji è parechji omi sò stati vituperati
 
In muntagna canarese ci anu  alzatu un’ usina
Da la cima à lu calzese chì tamanta ruina
 
In muntagna canarese ci anu  alzatu un’ usina
Pariamu in Caienne, cundannati à la morte
ùn a scrive l’avvene ci vulia à tene forte
Chì trista sorte
Petra di lu turmentu à tutti hà ingannatu
À dilla scappa u pientu… ghjente addulurata
 
In muntagna canarese ci anu  alzatu un’usina
Da la cima à lu calzese chì tamanta ruina
 
Eranu goffe stonde è travagliu ingratu
Cascavanu l’omoni velenu ghjastimatu
L’usina fù sacrata stu locu hè maladettu
Muntagna scurunata crepa lu core in pettu
 
 In muntagna canarese ci anu  alzatu un’usina
Da la cima à lu calzese chì tamanta ruina
In muntagna canarese ci anu  alzatu un’usina..

Antoine Marielli, Diana di l’alba