Neve di Ghjacumu Santu Versini

Hè una puesia di u pueta Ghjacumu Santu Versini (1867-1922) di Marignana, dettu Buscagliolu.
Hè stata publicata in A Cispra di marzu 1914. Era maestru .
L’ultima strufata hè stata aghjustata dopu, chì a si ramintavanu parechji di i sculari chì eranu stati à a scola cù ellu.

I grataghji fulighjinosi
Anu e so faldette bianche.
E fate ch'ùn sò mai stanche,
L'anu fatti cusì pumposi
I grataghji fulighjinosi...
 
I licciaconi è li pulloni
L'hà vistuti tutti lu ventu
Di casgiulelle d'argentu...
Sbaccuneghjanu da ricconi
I licciaconi è li pulloni...
 
U sole hè spentu,
U celu piegne...
Più tarra, più monti, più machja...
Un nivulu di corbi grachja...
Malasci à ch'ùn hà ghjuntu legne!
U sole hè spentu. U celu piegne...
 
Neva, neva, è neva fiori !
Di biancu s'impanna lu mondu...
Bellu granu sarà più tondu
Pà li buiaghji è li pastori.
Neva, neva è neva fiori!

Date u vostru parè nantu à neve