Menu
Lettu 118 volte

E croci, una cronaca di Petru Mari

Petru Mari era animatore po ghjurnalistu à RCFM.
Ghjustra paisana, Masai, Ghjustra liceana, Mediterraniu, Kantara, tutte st’emissioni l’avia imaginate à prò di a lingua è di a cultura corsa.
Stu scrittu, esce ancu ellu da a so cronaca cutighjana, Masai, meza seria meza macagnona. Hè mortu in u 2018, à 70 anni.


<i><b>E croci</b></i>, una cronaca di Petru Mari

"I rancichi, e pelli è avà e croci. Incù e croci cuntinuemu a visita di i sconci di a nostra sucetà isulana."


E croci

E croci sò issa ghjente chì ci impuzzichiscenu a vita, calpeghjanu u nostru suminatu. Sò iss’omi o isse donne chì imponenu , chì ci imponenu d’ascultà e so puesie ch’ùn finiscenu mai. Anu benintesu sempre i so scritti piegati sott’à l’ascella è guai à chì crocia, isse croci.
E croci sò isse donne o iss’omi chì, si per disgrazia li dumandate cum’elli stanu, vi contanu i so mal’anni e so malatie, cù tutti i detaglii, i particulari,  inguantenduvi per u godivu, perchè vo ùn possate fughje. È Dio ne libberi, s’è vo li date slanciu dumandenduli una spiegazione : li suffiate ventu in poppa è ci passate a nuttata.
A sola manera di francassila, o di sorteci à pocu pressu, hè d’ùn dì nunda , aspettendu u picculu silenziu, quella stundarella di fatica, quand’è vo sentite a manu di a croce ch’allena un pocu u morsu nant’à u vostru bracciu. Tandu, zacchi ! li scappate da e sgrinfie è libertà .
E croci, per noi giurnalisti, sò issi persunaggi sempre in affaccu à vulè parlà ind’è u postu, perche anu da scrive un libru, poi perch’elli scrivenu un libru, infine perch’elli l’anu scrittu. È dopu tutte isse passate, l’avete torna trà li pedi perchì, di u libru, ùn si n’hè parlatu à bastanza.
E croci, site voi, simu noi, sò eiu. Quantu, scurdenduci ch’elli ci anu cunnisciutu chjarasgiu è piglienduci pè ciò chè no simu, avemu i santissimi chì ingonfianu, ingonfianu. Allora, prufittemu ancu noi di a libertà d’esse conni, manghjenduci senza primura, quella di l’altri, à quali normalmente hè cuncessu d’ùn duvella suppurtà.
A vita hè una viacroce. Pè tutti tutti.

Petru Mari, Masai, Ed. Albiana, 2009.
<i><b>E croci</b></i>, una cronaca di Petru Mari