Menu
Lettu 75 volte

Reame, una puesia di Olivier Ancey


Dettu da Carlacatalina Suzzarini

<i>Reame</i>, una puesia di Olivier Ancey
reame.mp3 Reame.mp3  (1.22 Mo)


U scrittu

Reame
M’arricordu l’armunia
Di quella alba purpurina
È a stella matutina
Ch’inde u celu sbiadia.
M’arricordu l’aria pura

È l’ansciu di a natura
Quandu u ghjornu nascia.
 
M’arricordu a carezza

Di l’ambata prufumata

È u velu tinnarezza

Di a sciuma immaculata.
Sempre a mio nave mi pare
Azzicata da u mare
Chì m’annanna incù dulcezza.
 
Eiu ch’aghju sulcatu
L’onde di tanti mari,
Per l’orizonti chjari
Ch’avia sunniatu...
Eiu ch’aghju sfrisgiatu
L’onde di l’oceani, `
Per i vostri dumani
Ch’avia sunniatu...
 
M’arricordu u cristallu
Di issu reame turchinu
 È ogni fondu marinu
Intricciatu di curallu.
È tante sirene bionde,
Principesse in le so onde
 Chì m’invitonu à u ballu.
 
M’arricordu a magia

Di quella attrachjata bruna
Quandu u sole ridia
Ghjuchendusi cù a luna.
Era l’ora più serena,
Fascendu d’oru a rena
L’ultimu ragiu muria.
 
Olivier Ancey, Tarra matre,  Ed Albiana, 2010.