Menu
Lettu 50 volte

L'amanti maladetti, una canzona stratta da u dischettu di Tavagna , Blues di paese

Jean Pierre Lanfranchi, scrive è mette in scena parechje pezze di teatru. Prufessore, è cumediente in a cumpagnia « Unità teatrale » ch’ellu hà creatu in u 1999 hè dinù cantadore è pueta in u gruppu Tavagna.
L’amanti maladetti hè una canzona d’una forza puetica trementa stratta da u dischettu di Tavagna , Blues di paese, esciutu in u 1990.


<i>L'amanti maladetti</i>, una canzona stratta da u dischettu  di Tavagna ,<i> Blues di paese</i>
Stu scrittu, palesa l’intulerenza di una sucetà chjosa in i so codici murali , ci conta a storia di dui amanti chì piattanu u so amore. Scuperti, scatenanu l’ira di u paese, ma l’amore ùn si pò parà « l’amore ùn hè da criticà ». L’amanti fughjenu in muntagna, unicu rifugiu, da pudè campà felici.

Per la manu à listessu passu
Fughjendu u paese accanitu
In la filetta si sò chjinati
In quella machja ultima casa
U core à strappà lu pettu
È l’ochji pieni di lume crosciu
Ma ci hè un locu in muntagna
Chì mancu d’estate ùn vole siccà.
 
U ghjornu avia figliulatu
Di a so notte à più nera
Ancu lu tonu ci si era messu
Cum’è à vulelli cundannà
E campane di u scandalu
Si sò tutte messe à sunà
Ma ci hè un locu in muntagna
Chì mancu d’estate ùn vole siccà.
 
Sunate puru campane inferne
L’amore ùn hè da criticà
E vostre voci à noi sò mute
Ùn le vulemu ascultà
Nunda quì ci pò mantene
E pieni ùn si ponu parà
Ma ci hè un locu in muntagna
Chì mancu d’estate ùn vole siccà.
 
Da poi ùn sò mai più ghjunti
Pare ch’elli sò sempre in machja
Amutuliti i paisani
Ùn anu più nimu à sprezzà
Da l’amanti maladetti
Nimu ùn ne vole più parlà
Ma ci hè un locu in muntagna
Chì mancu d’estate ùn vole siccà
.