Menu
Lettu 55 volte

Bonghjornu o madamicella , un serinatu di Pampasgiolu

Don Ghjaseppu Giansily (1911 /1977), dettu Pampasgiolu, di u paese di l’Acquale in Niolu, cunnisciutu è ricunnisciutu cum’è unu di i più famosi impruvisatore è pueta di Corsica.
Hà scrittu stu magnificu serinatu in u 1938. Fù publicatu in l’almanaccu di MaIstrale è cantatu da Carlu Rocchi.


<i>Bonghjornu o madamicella </i>, un serinatu di Pampasgiolu
In a sucetà tradiziunale, u cantu accumpagnava ogni stonda di a vita. Issi canti sò a spressione sputica è schietta di a nostra litteratura à bocca.
U serinatu hè un cantu d’amore.
Cunsideratu cum’è l’archettippu di u serinatu, stu cantu scrittu in versi tradiziunali (sestine ottunarie) palesa u talente for di misura di st’autore .

Bonghjornu o madamicella

Bonghjornu o madamicella
Scusate la mio gnuranza
S’e vi scrivu duie righe
Senza alcuna cunfidanza
Vularia malgradu tuttu
Fà a vostra cunniscianza
 
 Saparete o signurina
Chì dipoi quella sera
Certu vi ricurdarete
D’un terzu ghjornu di fiera
Ùn ne riposu più in pace
Campu ghjustu à straziera
 
Pensendu à quelle cantate
Si ne sdrughje lu mio core
V’aghju sempre indu l’edea
Ghjornu notte à tutte l’ore
Sarete voi or la cagione
Di fammi scimisce o more
 
Per voi andaria errente
À girà lu mondu interu
Scalzu spugliatu è famitu
Carcu d’angoscia è pinseru
Guardate la mio zitella
S’e vi sò pocu sinceru
 
Credu chì lu vostru core
Sia sinceru è discretu
Per pudè sparte cù mè
U più prufondu sicretu
Sariste la preferita
D’un anzianu puetu
 
S’è v’avete un core in pettu
Cum’è tutte le zitelle
Mi rispundarete prestu
Senza fà mi machjavelle
Fendu mi prumissione
Sicure, stabile è belle
 
Speru chì la mio dumanda
Avarà suddisfazione
Da parte vostra pigliata
In cunsiderazione
Per fà mi campà felice
Ùn ci hè altra cundizione
 
A mio spiranza assicura
Un billissimu successu
L’avaraghju sunniata
Ma ci speru per listessu
Mi pare d’esse cun voi
È di rimirà vi à spessu
 
Vi pregu di fà mi prestu
Una pricisa risposta
Ben’ intesa in puesia
Sarete certu disposta
Ch’e sondi le vostre rime
Pè u mezu di a posta
 
Circate d’apprufundisce
La dumanda ch’e vi facciu
Quì m’arrestu scusarete
Sì da luntanu v’abbracciu
Pensarete senza dubbiu
À u puetu l’acqualacciu.
G.Giansily, dettu « Pampasgiolu » ,1938