<i><b> A serva </b></i>, una nuvella di Pasquale Ottavi

A giuvanotta avanza in lu curridore di a casa signurile, grevu di silenziu,in tantu di pisà a stanghetta è di dà l’invitu casanu à a caldiana traiendu l’usciu. Un’ antra volta s’innumidisce a faccia po si dà curagiu à esce : sottu à u frundame, mancu un alitu, in piazza nimu, hè inghjunu à l’ascosu.

Compiu ch’ella hà a cullaziò, a Signora hè andata à riposassi è u Sgiò u so caffè u s’ingolle pianarellu. U so sguardu suveta i to gesti, hè attente à u minimu rimore ch’è tù poi fà. A so brama ti vene addossu è t’incappia. Tù passi è veni, scumbatti è ùn avventi nulla. Quellu s’arrizza è si ritira in stanza soia senza dì nulla. Tù, compiu ch’è tù ai, cacci u to scurzale è acconci i to capelli ghjandaghjini. Ricoglie a manghjusca ind’un tuvagliolu, quella ch’è tù ai da purtà in casa, l’aspettanu sempre i chjuchi, po ti ne esci in curridore. A casa hè muta, bughja, ogni cosa abbambanata. Ti faci avanti, lebbia, sin’à in punta di a scala. A stanza di u Sgiò, hè sgrignata a porta, fideghji passendu, in fughjoni, in più bella... Millu davanti à tè, à tocca tocca, in punta à a scala, cù a so dintera bianca è i so capelli muscanti à brigliantina ! È ghjà t’hà inguantatu u polzu...
Anghjula, o À, ùn ci entri ! Prima cà tè sò state tante, e serve è ancu l’altre, masimu e serve, in tempi di u babbu era aghjà cusì è cun ellu torna à Vignale. Anghjula, o À, ci vai. Arresa. Ti lasci fà. Hè vera, bellu omu hè, musca, cù e donne ci capisce, hà stu fascinu chì nimu li risiste. Tù ùn ci fussi mai intruta o À in quella stanza. U me amore l’ai sacrificatu, avà, a cucculata a l’avete minata tramindui ; aspittava imbisgialitu ch’ella li falessi in capu. Secca, à mezu fronte. Cun versu. Un colpu solu. Po polzu. Tazzatu. Eccu, sò sprifundatu oramai. (...)
Sò scorsi i mesi. A serva, senza anscià, hà doppia faccenda, quella di a casa è quella di u lettu. Ma Signora mai sarà. Gattivu po ùn hè l’omu : robba li ne dà, po quellu bigliettu, in casa ind’è ella stanu à pocu pressu.
À mè mi s’hè sparita a risa, cum’ è s’ella ùn ci fussi mai stata in bocca meia, mi s’hè spenta a voce, impruvisate più. Eiu zappu è tù scumbatti...
Hè passatu un annu, in casa signurile ci hè l’aligria. À l’usciu, l’arcu di bussu musca. Oghje quì hè gran matrimoniu : anu da esse unite e duie famiglie più ricche di u cantone. A moglia tantu bella ùn hè ma a mità di a piaghja hè soia. U Sgiò sarà ancu più Sgiò, a Signora ancu più Signora, i ricchi ricchi ancu di più. Tantu e donne l’avarà listessu ellu, chì li piacenu sempre. A moglia quella curarà e serve, darà ordini è cumandi. Curarà à tè, o À.
Ma chì ai fattu ? A to giuventù a t’hà scruccata. U prezzu di sta scruccunaria l’ai in corpu, a sai. U bastardacciu l’avarè da tene tù. A vargogna l’ai messa in casa toia, chì nimu a sà. Sì, eiu. T’avaria rispittatu eiu. Ùn m’ai mancu datu capu, nè quand’e ti truvava à spassu nè quand’e affaccava in casa à truvà à babbitu è à to fratellu : si parlava di e ghjurnate. Tù surridii è scappavi : eiu inciuffava d’amore. Invece avà, a cagione di a to vargogna l’ai à mezu corpu. Ma chì ai fattu ? Ti tengu cara. Eiu ùn la ti pudia dì cusì chì ùn si face ma u Sgiò ellu a to giuventù a t’hà furata : avetti basgiatu eiu à meza piazza, chì tandu ùn ci era falata a scumunica ! (...)
Ùn fà quessa o À. Ai persu a to giuventù, tù ùn aghji da perde di più. Lascia fà à mè. Quessa tocca à l’omi. Innò o À, era accantu à tè è aghju capitu. Scimità n’ai fattu abbastanza : quand’e aghju vistu affaccà u ceppu di a catana, mi s’hè parsu di rinvivì. Lascia fà à mè chì sò un omu. Mì, fideghja, a catana a pigliu eiu, mi torra à corre u sangue in le vene, sò vultatu da morte in là. Inghjunu ride è ciarla, u pueta in capu u so brinchisi l’hà appruntatu. Eiu stringu u chjodu. Quattru colpi. Nantu à u vistitu di a Signora correnu e sanguinicce. U sangue di quellu chì t’hà ingannatu. Guarda, hè finita. Mi sentu megliu. Rinvivitu. Ai vistu ? Sò un omu. Ùn mi dà a manu, ch’elli ùn capiscanu. Eiu sbruglià mi sbrogliu. Mì, ùn sentu più nulla aghjà. Nè brioni, nè pienti, nè ghjasteme.
Mi tribbianu, ùn vole dì, t’aghju vindicatu. Eiu sò in paradisu.
O À, sta volta po m’ai capitu. Vaitine tù, varca u mare, vai ind’è tù poi. Allevalu u to ciucciu, bastardu ùn hè chì hè u to sangue. Ma s’ellu era statu u meiu... Eiu, o more quì o sò tanti anni in Caiena. Anghjula, o À, ùn pinsà più à mè : sò un zappaghjolu eiu, piovenu i colpi, mi vene u sangue indi l’ochji. Induva sè la me nice ? Ma quantu ti tengu cara !

Pasquale Ottavi, U ghjornu ch’ellu vultarà, ed. Albiana/CCU, 2003.

Puesia "A serva" di Alanu Di Meglio

Alanu Di Meglio
Natu in u 1959, di ceppu bunifazincu. Fù stitutore, prufessore, nanziu d’esse  prufessore circadore in sociulinguistica è didattica di e lingue à l’Università di Corsica.
Hà scrittu nuvelle è puesie è parechje canzone, A serva fù una di quelle chì ebbi u più gran successu.

Eiu paisanu fieru
Ghjurnatantu è disgraziatu
Vogliu cantà l'addisperu
Di lu mio amore scunciatu
Anghjula pura è fantina
Di u veranu più bellu fiore
Si n'andò quella matina
À fà serva à li signori.
Anghjula Anghjula mea
A ruvina mi purtasti
Stu ghjornu duv'è n'andasti
In li sgiò
È ne francasti lu purtò

L'estate l'aria infiarava
Eri stanca à la funtana
A to ciretta pisava
Sott'à quella sciappittana
Eiu rozu travagliadore
Ùn truvai mai la stonda
Ellu giovanu signore
Bellu ti girava in tondu
Anghjula Anghjula mea
Fù cusì nun ricusasti
A to giuventù li dasti
À stu sgiò
Chì in la so casa t'ingannò

Trà a cardellina è u corbu
Matrimonii ùn ne pò nasce
Puru un criaturu in corpu
U sgiò ingratu ti tralascia
Stu ghjornu era festa in piazza
Misurasti a to sciagura
Spusava una di razza
Ricca di ceppu sicuru
Anghjula Anghjula mea
Issa pistola ch'è tù purtasti
A ti cacciai, ùn la mi dasti
È u sgiò
Fù la mio manu chì u tumbò

Voce Ventu canta "A serva"

Date u vostru parè nantu à A serva

A serva , una nuvella di Pasquale Ottavi

Puesia "A serva" di Alanu Di Meglio

Voce Ventu canta "A serva"